月光华华

月光华华，
点火烧茶。
茶一杯，酒一杯，
嘀嘀嗒嗒讨新妇。
讨个新妇矮墩墩，
蒸个饭子香喷喷；
讨个新妇高喃喃，
挑担谷子好清闲；
讨个新妇笑嘻嘻，
三餐唔食肚唔饥；
讨个新妇嘴嘟嘟，
欢喜食甜也食苦。
食得苦，唔怕苦；
唔怕苦，脱得苦，
脱得苦，有福享；
有福享，要回想。

月光圆圆

月光圆圆，
阿妈种田；
种田插秧，
打谷满仓。
满仓谷米，
阿妈欢喜。

火焰虫

火焰虫，
蝍蝍虫，
翻转屁股吊灯笼.

火焰虫，
蝍蝍虫，
半夜下来吊灯笼。

火萤虫

火萤虫，啷啷虫，
桃子树下吊灯笼。
灯笼光，照四方；
四方暗，跌落坎；
坎下一枚针，
捡来送观音；
观音面前一丛禾，
割了一担又一箩，
分奔你来涯又冇。

月光光

月光光，好种姜；
姜必目，好种竹；
竹开花，好种瓜；
瓜会大，摘来卖。
卖到三点钱，
拿来学打棉；
棉线断，学打砖；
砖断节，学打铁；
铁生鲁，学杀猪；
猪会走，学杀狗；
狗会咬，学杀鸟；
鸟会飞，飞到哪里，
飞到榕树下，
捡到一个烂冬瓜。
拿转去，食唔下，
一泻泻到满厅下。

蟾蜍罗

蟾蜍罗，
咯咯咯，
唔读书，
冇老婆.

山鹁鸪，
咕咕咕，
唔读书，
大蕃薯。

懒尸嬷

赤勒子，开白花，
唔做细，转妹家。
走东家，串西家，
懒尸嬷，害自家。
锅盖上尘菜打花。

禾毕子

禾毕子，喙呀呀，
上桃树，啄桃花。
桃花李花任你啄，
莫啄龙眼荔枝花。
龙眼拿来等人客，
荔枝拿来接亲家。

人之初

先生教我人之初，
我教先生打山猪。
山猪飚过河，
吓到先生背都驼。

月光光

月光光，秀才郎。
骑竹马，过院场。
院场中，好栽葱。
葱发芽，摘细茶，
茶花开，桃花红。
十只鸡子做两笼，
挑到姐姐门口过，
姐姐留涯住，涯唔住，
涯要回家栽漆树。
漆树深深青，
遮过观音岭。
观音岭里一伙鹅，
呢呢哦哦飞过河。
观音岭里一伙鸡，
吱吱喳喳飞过溪。
观音岭里一伙鸭，
呢呢嘎嘎飞过塔。

大蕃薯

大蕃薯，真胡涂，
好食懒做唔读书，
唔会算，唔会除，
冇头冇脑冇目珠，
明明蛇哥讲系龙，
明明猫公讲系虎，
明明筷菜讲系葱，
明明菜瓜讲系匏。

七姑星

七姑星、七姊妹，
半夜下来摘芥菜，
摘得几多皮，
摘得十八皮，
留一皮，
嫁满姨，
唔么嫁，
十七十八爱行嫁，
嫁啊奈位去？
嫁啊美浓竹头背，
又有糖，
又有蔗，
吃得牙齿乌咑咑。

阿楸箭

阿楸箭，阿楸唧，
上背叔婆做生日，
唔知爱奔涯去也唔奔涯去，
害涯打扮两三日。

中秀才

四四方方一张桌，
年年读书涯也来，
你读三年唔识字，
涯读三年中秀才。

卖咸菜

阿妞妹, 卖咸菜.
卖到伯公下笃目睡,
狗仔紧吠,
阿妞妹趟快走去拢布袋.

掌牛阿哥

掌牛阿哥面黄黄,
三餐食饭爱搂糖,
汝爸唔系开糖店,
汝母唔系绣花娘,
汝哥唔系开银行,
汝姐唔系观音娘.

妹妹莫叫

妹妹莫叫 乖乖上轿 
又有新鞋 又有新帽 
又有新郎公同你料
莫叫莫叫 乖乖上轿 
又有锣鼓 又有花轿  
暗晡夜又有新郎公同你料

割猪肉

阿妹妹,睡目目,
阿爸上圩割猪肉.
行到半路遇倒只黃阿叔,
狗一局,爬上屋.
屋上跌啊下,
腳骨跌啊曲.      

神前下

神前下，十八家，
朝朝起来望水花，
冇米煮，煮泥沙，
冇眠床，睡厅下，
冇被盖，竹叶遮，
冇菜食，食树芽。